查看完整版本: 地鐵站對照表[續]1-10日

四月 29-12-2005 19:12

地鐵站對照表[續]1-10日

1•上 環 / 中 環 : 花 心 一 哥
性格:
同中上環D高樓商業大廈一樣,好有創造力,成日想做一哥,鍾意向新事物挑戰,不成功便成仁。之但係另一面你,其實又好怕無敵是最寂寞,成功之後又驚失去其他野。人無十全十美,好心你就唔好自我澎漲得咁勁啦!否則做人最後就算得到所有名利,都會孤獨唔開心! (十足十創世紀咁)同時你份人本質鍾意向新事物挑戰,所以唔多鍾意同屋企人住,想靜靜地但又姣婆守唔到寡,幸好你下半世都會有安定生活過,唔係都幾頭痛!
愛情:
會有D欣賞你孤獨氣質的人鍾意你,未來都會有幸福家庭。但係因為你太過怕孤獨,為左有番D安全感,好容易投懷送抱俾第三、四者,小心婚外情呀!通常上環 / 中環的女性同子女都無乜緣份,好彩D仔女算醒目扮下孝順。而妳自己個樣又青春常駐,成日都咁後生,幾襟老!


2•金 鐘 / 尖 沙 咀 : 恨 嫁 開 心 果
性格:
你份人好敏感、隨和,又愛好和平,兼且有第六感。基本上你係一個好有理想同計劃的人,可惜世事往往同現實有距離。事關無論之前你點計劃舖條路走,但係行到一半,自自然就會轉去做第二件事,好似去到金鐘就要轉車咁、完全唔受你自己控制,所以成日覺得做人好矛盾,懷疑自己係咪有雙重性格,不過可以答你:唔係!純粹係命運安排玩你唧!你可以令到周圍的人開心,又喜歡做和事佬幫人排解糾紛,可惜好多時物極必反,令自己好易做人無晒信心,只係識得為人設想,勉強無幸福呀!
愛情:
同性格一樣,物質行先!女仔最想嫁有錢佬,結果嫁著個窮鬼。雖然同另一半相處好似好好,其實鬧交多過食飯。好相信自己的第六感,一睇中就當正係真命天子,到頭來同理想相差一大截,又因為咁而成日感覺受傷害。係咪幸福要睇你自己點睇咯!


3•佐 敦 : 神 經 藝 術 家
性格:
溫柔有幽默感,仲好有創造力同藝術感,凡事要追求完美。唉!世事邊有咁理想?你會係事業就算好成功,但係唔識得平衡處理,結果反而唔討好其他人,變相令自己仲乞人憎,立場尷尬。就好似佐敦站咁,乜都有D、但又唔知算係乜區,因此令你個人好界燥,不斷煩呢煩路無覺好。 另外你又係一個嚴重缺乏安全感既人,仲好易對一件事物或人厭倦,成日要搵新刺激。做人好多時都唔定主意,有少少懶散又帶D神經質,至麻煩係你好貪慕虛榮同易妒忌人,自己執生啦!
愛情:
男女都好容易踩落三角戀陷阱。如果你係男性,同三個人合作做生意最好,搞三角戀就可免則免!無謂浪費精力而影響事業。女性似乎無可避免一定會出現三角關係,最大可能會成日因為呢個問題同丈夫嘈到離婚,不過唔駛驚喎!離開之後明天可能會更好呀!係你就係你,唔係你霸住把鬼咩!?


4•油 麻 地 : 規 律 悶 蛋
性格:
生活有規律,四平八穩之人。唔鍾意投機取巧,係真正靠努力一分一毫搵番黎實幹型人仕。對事物要求實用性多過外觀,又好果斷判事情。勤奮又易得上司信任。大致上講似油麻地咁,街坊得黎又貼住個市、係個唔貪慕虛榮,實事求事既人。 可惜因為太誠實、坦率、公正,變成默守成規,人地唔明白就當你頑固不可救藥,對人又唔得圓滑世故。過於克制自己感情同財政各方面,變得同人有隔膜唔易滿通,要學下點變通先得!
愛情:
基本上愛情路上暢通無乜阻滯,同伴侶會開花結果。但係過份偏激,又容易同時一腳踏幾船,原本好地地都會搞出個大頭佛,甚至令自己精神崩潰。所以同你夢想中既愛情有好大出入,好可能反方向而行,亦舒金句:相愛一個人,與之結婚生子又是另一個人!


5•旺 角 / 太 子 : 瀟 灑 情 聖
性格:
唔安於現狀,要不斷向新事物挑戰,酷愛自由自在又刺激既生活,直情就係旺角/太子既寫照。最鍾意周圍去旅行,從中見識新事物,係充滿精力既人。多才多藝之餘,仲好識交際,永遠追得上潮流。可惜你缺點實在太多!做人唔負責任,開左個頭就走左去。成日執著某D事,譬如一心二用,到頭來只係得一件事成功。做事無耐性又唔夠細心,又唔得集中精神。所以你一生會大起大跌無數次,幸好晚年運都算幾好,唔係真係戥你擔心呀!
愛情:
因為過份心散又一心二用,拍緊拖都掛住做第二樣野,試問另外果一半點忍得你呢?雖然你好有冒險同試新精神,身上無形散發出一股魅力吸引異性,之不過最後可唔可以到尾.....自己諗啦!


6•深水埗: 驕 傲 固 執 王
性格:
同深水埗一樣,俾人以為你古怪難接近,查實本身係個有同情心,喜歡關心人的理想主義者。你又好有藝術同創造力,好適合在娛樂圈同設計行業發展。最特別係幸運之神好眷顧你,因為你條命整定成日會遭遇唔少危險事物或者人,但係每次都能夠逢凶化吉。你又好識遷就人,所以得唔少人信任。不過因為你太有藝術家脾氣,變得判斷事物唔得客觀理智,過份偏執同要求完美,於是令人覺得你太以自我為中心,無乜責任感同自私。仲有呀!你太過鍾意理人閒事,咁會不知不覺樹敵,仲慒閉閉以為人地會讚你好人潻!
愛情:
可能幸運之神太眷顧你!所以無論感情定工作,只會跟自己喜好去選擇。因為咁,俾人迷惑機會大大增加,正所謂一失足成千古恨,自己醒定D啦!同時唔好太驕傲自滿,否則幾好的伴侶都同你say sayonara。一句講晒,有風唔好駛盡悝。


7•長沙灣: 苦 戀 王
性格:
你份人思考同分析力都好強,又鍾意批評人,一切都要追求完美。大部份長沙灣站既人,先天已有才能,事業會有成。表面睇你仲係一隻不死鳥,遭遇十分幸運。然而,呢D幸運係有代價!因為無論你事業上點成功都好,背後一定有D不為人知既不幸降臨係你身上,唔係感情就係家庭出現重大變化,令你一生都要背負住身體或者心靈上既創傷,仲要俾人錯覺你係好幸福既人咁生存落去。有無解救方法?因為呢D就係你既宿命,幾痛苦既人生。
愛情:
你愛人愛得好痛苦,甚至要比平常人付出更多更多先得到所愛。以為從此可以過幸福生活?唔係呀!好可能到頭來落得一場空。長沙灣既人,大多數唔係同情人分離就係無下一代,又或者不斷俾所愛既人背叛,搵你寫愛情大悲劇就最適合!


8•荔枝角: 幸 福 野 心 家
性格:
你係一個好勝又好大野心既人,先天性已經鍾意支配周圍既人,又要追求物質同安全感。無疑你係幾有做事計劃同組織能力,最好做生意或者從事法律等等既行業,係商界會係主管級人馬。為人又好識得好天斬埋落雨柴,勤力得黎仲好識衡量價值,最喜歡睇心靈雞湯,然之後扮晒心理專家去指導人。 不過係人地眼中睇,你其實幾自私自利,唔會體諒他人立場同難處。故此你既人生趨向於自我滅亡,就算你既愛情、事業幾如意都好,你一定會失去一D對你好重要寶貴既野,到時恨錯難返,祝你好運啦!
愛情:
你幸運在會有支持而又愛你既伴侶,可惜物極必反,當對方得到你個心,自自然就要番你一D野做交換。如果你能夠忍到,又夠大膽積極,兼且幸運之神眷顧你,應該可以大步檻過,得到幸福美滿家庭。


9•美孚 : 遲 婚 強 人
性格:
你好相信命運安排,而命運又偏偏喜歡玩你,真係天生一對呀!事關你一生會不斷遇到大大小小挫折,不過憑住你豐富既創造同毅力,個天塌落唻都可以俾你頂住,認真厲害、就似咁多年風風雨雨、美孚仍然係優質筍盤咁。所以係美孚車站D人,好多時係靠自己力量改變既命運都唔知,最後竟然可以俾你扭轉埋頹勢。據調查所得,做建築或者挽救將會倒閉公司既大企業家,好多都係美孚站人! 你既缺點係做人易緊張、憂愁,仲有少少自卑感,連帶負面既自私都出埋。做人難以自我控制,較為情緒化同敏感潻!
愛情:
男性因為有才能而吸引唔少異性。女性因為太女強人,所以大部份屬遲婚或者單身人仕,如果肯變得溫柔D,可能會有意想不到效果。又或者由朋友介紹相睇,較大機會搵到理想對象。總之唔好太計較伴侶唔夠你叻,略為遷就就有幸福!


10•荔景: 孤 獨 富 翁
性格:
精力過人有領導同創造力,為人樂觀、勇敢有說服力,對人太好,對事業有野心。對事物睇法另有自己一套世界觀,就算旁人反對,仍然一意孤行,所以有時唔受歡迎。因為你太過鍾意向高難度挑戰,加上有良好背景支撐,所以必定光芒四射成為巨富,可以達到理想目標。係人地眼中你已經係好幸福,但係你就永遠都覺得唔夠,又容易對一件事生厭,點都要搵第二D填補你既空白,成日要求所做既行業成為行中表表者。但係你好易恐懼,無乜安全感同喜歡勉強自己而為,仲幾驕傲自大。幸好你一生接觸唔少大事,先令你無咁自我為中心呀!
愛情:
最大機會係朋友介紹認識或者相睇搵到另一半。不過情海多翻波,更加容易發生醜聞,可以講係悲劇。就算有錢有面都會感情失落,只有羨慕人地,好多時會出師未折身先死,戥你凄涼呀!
頁: [1]
查看完整版本: 地鐵站對照表[續]1-10日